مذكرات مراهق سابق

على فكره المراهق كويتي



شفت واحد من الشباب معروف أنه قذر والمصيبة أني شفته بذاك اليوم إنسان ثاني!!؟؟!! قربت منه وأنا أشم ريحة الكولونيا ، والأخ ضارب الشعر فرق تقول مسوي الفرق بسجيــن وماسك مسجل وحاط شريط سميرة سعيد" تلقاني بعد يومين " وطبعاً الأخ لابس بنطلون أدعم وفانيلة بيج، تقول سنيكرس مو صبي!!! وأنا أطالعه ماني مصدق، قلت سبحان الذي يغير ولا يتغير، وإلا يطالعني وقال : عن الطنازة، رديت: على شنو أتطنز، أنت بصراحة ذكرتني بقصة الجربوع اللي صار تمساح!! وإلا يخزني...وقلت له: أخذوك عشان اتسوي دعاية "لولو" و"تايد" وإلا يرد: لا حبيبي، أنا طول عمري حلو، بس أنت محترّ مني لأنك شفت أحد أحلى منك. وقعدت أتلفت يمين وشمال، وقلت منو ذي اللي أحلى مني، والا يأشر على نفسه ويقول: أخوك اللي واقف جدامك أحلى منك ، وعلى فكرة أنا خلاص ما قمت أعطي بنات المنطقة ويه لأن حبيباتي صاروا كلهم بحولي والسالمية، وأنا طالعته ومت من القهر وقلت: له عاد اتصدق إنك صاج، فعلاً بنات المنطقة مو كفو أحد يعطيهم ويه، نصهم حرامية نعل، والنص الثاني بجيوبهم نبطات وما في إلا شويه منهم يسوون عناقيص بس مع الأسف هم بروسهم في قمل واللي ذربه حيل تلقى في جيبها بريعصي والا زهويّة وويوهم كلها شموخ تقول دفتر صح وخطأ. إلا رفيجي قال أنت ألحين شنو تبي؟. ورديت: أبي أروح معاك مادام حولي تسوي الواحد حلو جذي باروح معاك. ورد: اتصدق لأني أعزك راح آخذك معاي باجر الظهر راح تروح معاي. والا أقوله: تكفى خلني أبوسك. والا يرد: لا أخوي وفر البوس حق باجر ما راح تلحق من كثر الحريم ، راح تصير ذبحة عليك باجر، إذا أنا وماتوا كل البنات علي عيل أنت شنو راح يسوون؟. قلت حقه: يمكن يحرقون نفسهم.. ورديت: عاد اتصدق إنك صاج، إذا أنت يالغراب وعرفت بنات أنا ما أعرف.وثاني يوم كشخت على الآخر وما خليت جل ولا ريحة بالبيت إلا حطيت منها وكشخت والساعة واحدة الظهر لبست نظارتي اللي شريتها بربع دينار ولازقها بلزاق وقلت قبل الفشلة إذا وصلت انزعها وركبنا باص وقطعنا الشارع، وأشّرنا ووصلتنا حرمة عمرها خمسة آلاف سنة...طول الطريق: أنتم ما عندكم أهل. ومعاها عيالها قاعدة اتعلمهم علينا شفتوا هذول هم اليهال اللي يطلعون بالشمس وياكلهم الجني، وأول ما نزلت أنا ورفيجي قلت حق اللي بالسيارة: لا تصدقونها، ترى تقص عليكم، ترى ما في جني ولا ياكل الناس، الجني أصلاً ما عنده ضروس عشان ياكل الناس. والا ترد : يعل صاروخ يشق ويهك أنت مع هالسنجاب اللي معاك. وقلت: شفت حتى الحجية تعرفك!! والا قعدنا جدام بلكونة عمارة، وقال : اصبر شوية ألحين يطلعون. وقعدت لين صارت الساعة 4 ومحد طلع, والشمس سلخت جلودنا وصارت وجوهنا أربعة ألوان...وإلا تطلع وحدة، والا يقول: خلاص هذي حقك. وأنا رحت وهي واقفة تنشر ثياب وقلت: مرحب يعني ذرب. وردت: أهلين شو بك. رديت: بدي اتعرف. قالت: شو أنت ما تختشي على دمك وأنت صبي وتقول هالحكي!. رديت: شنو أختشي صار لي 3 ساعات بهالشمس جني عتوي تحت البلكونة وتقولين استحي على دمك وأنا متحلّم فيج أمس وألحين ما تعطيني ويه، شو قلة الذوق هذي. وقالت: شو، طيب هسه بوريك. والا تصرخ وتقول أبوالعبد.... أبو العبد!! وطلع أبوالعبد من البلكونة، وأنا من الخرعة ريولي مو قادرة تتحرك، ومن الخرعة ماني قادر أوصف أبو العبد. المهم أنه يشابه بقرة عليها شوارب، وانحشت أنا مع هالكلب اللي جابني معاه، ووصلنا المنطقة، واول ما وصلنا قلت له: على فكرة ترى عندي لك خوش هدية حاطها لك بالبيت. ورد: تسلم هذي الهقوة فيك. وأخذته البيت، وأخذت سطل الغسيل وفتحت بالوعة الحوش وعبيتها، ورحت فـــوق السطح ، وعلى راسه وقلت له: روح حق أبو العبد خله يحطك بالغسالة وينشفك يا قليل الحيا، اشفيهم بنات منطقتنا ، أحلى منهم ماكو، صج أنهم كلهم شبه حضيري بوعزيز وسعد الحلي بس هم حلوات عند أبوالعبد هذا ، لو ماسكني جان أنا اسمي اليوم ضحية أبو العبد!!
>
>
>
>
>
>للكاتب: بدر عبدالعزيز
>
>