أنــا العــزوبـي..!

أنا العزوبــــي وأتقطع تقطـــــاع
على زواج البنت تدمع عيوني


أنا العزوبي ويـــن مارحت ملتـــــــاع
زين العذارى يالعرب جننوني

أشوفهم في كل روحـــه ومرجـــــــاع
من حيث ماوليت هم عذبوني

فالبيت فالتلفاز والصـــوت مذيـــــــاع
حتى العمل يا ناس مافارقوني

وليا نويت الســـوق ناوي تبضـــــــاع
أروح وارجع منخطف حيل لوني

ارجــــع وقلبـــي حايسٍ بين الأضلاع
من زود دقاته تخلع امتوني

اللـــــــــي تغنــــج فالمشـي بالـتـدلاع
واللي تناظرني بطرفـ(ن) فتوني


وأم العيـــون السود والرمـش قطـاع
وأم الجدايل والكحل بالجفونـي

وأم النقاب اللـــــي تمصـع تمصــــاع
قدام عيني والبشـر يشهدونـي

كنهـا تمتـع فـــــي عذابـي تمتــــــــاع
وأنا العزوبي كان ربي ف عوني

وأهل الجنوز الضيقة وأهل الاوساع
مدري وش اللي حدهم يلبسوني

منهـم تجرعـت المرارة تجـــــــراع
في كل يوم يزيد همي وحزوني

لو نطلع المريخ في لحظـه وســـــاع
نلقى العوايـل قبلنـا يطلعونـي

من بعد طرح وجمع وهموم وصـراع
قررت أنا اخطب بنت وانهي ظنوني

وفي ليلة الفرحة تقـول إني مرتـــاع
ومن زود ما فينـي تراقـل سنونـي

أبوها قـال اليـــــوم مانـي بطـمـــــاع
عندي شروط(ن) للمهر واعذرونـي

يقوم يوحـي لـي ويشــر بالاصبــــــاع
يبغي المهـر ميتيـن أو يكثرونـي

يقول يبغى العرس في قصور وقـلاع
ونبغي ذهب لام العروس المزونـي

ونبغي الحلا والكيك من كـل الأنواع
تـبـون وإلا ياعـسـى ماتبـونـي

نـــاس ٍ تحسب البنت شروه ومبيـــاع
تبي المكاسب لو زادت ديوني

ما همهم لـــو زاد همي والأوجاع
ما همهم ياكود ملي البطونـي

يــــا مؤمنـن بالله ساجـــــد وركــــــاع
بنتك أمانه حاذر انك تخونـي

لا تعنس ابنيتك فـــي سّبت إشباع
نفسك وجمع افلوس ماينفعوني

بكره ليا جتك المنية والأوجاع
تندم ولا ينفعك دمع العيونـي

الخيمة اللـي بدون عمدان وشــــراع
يمكن تطيرها الهبايب بهوني

أنا العزوبــــــي وأتسكع تسكـــــاع
تكفون بالله يالعرب زوجوني